 |
| Musim marsillok eme di huta Pardugul, Kecamatan Pangururan, Kabupaten Samosir, Jumat (1/12/2017). |
Samosir, Bona Pasogit
Na uju i manang na jolo, tung sikkor do dihilala akka Oppung ta laho mangula hauma. Soadong dope uju i Jetor songon i masa nuaeng on. Mangombak balik do.
Asa sikkop hauma manang juma, ikkon borhat do hu juma andorang so bissar dope mataniari. Sodihilala ngali ni alogo manogot, dohot ngali ni aek na mengge di hauma i. Alai ikkon do dilakkahon simanjojak nasida hu buttahi. Massai sikkor nian.
Suang songoni do ditikki mambuat eme molo dung russang jala matoras. Loja do mardege nasida, olo sahat hu bodari, i rambon ni ari, jala olo do borhat tibu manogot i laho mardege. Dang hinata, soadong dope Komben i masa i. Ngeri ma tahe.
 |
| Nga pakke juma laho si sillokkonon, Kamis (1/12/2017). |
Lam hu leleng na, lam tabo ma pakkilala an ni akka na parjolo i. Gatti ni mangombak balik, nga adong lukku, ima na i tarik pakke gogo ni Horbo. Lam niang ma pakkilala an ni akka na parjolo i.
Suang songoni muse ma nang mambuat eme. Nga dipatupa be sada ugasan songon gatti ni na mardege. Dipatupa ma ugasan na margoar pamampasan, ima na ibahen sian bulu dohot boroti, ibahen rupana songon meja makkan. Husima i pas-pas hon biur ni eme i, asa akka tur-tur biur na i.
 |
| Juma paremean di huta Pardugul, nga hampir sae manillok, Kamis (1/12/2017). |
Alai nang pe songoni, tong do uttabo an, akka na parjolo i, unang itikki on. Akka Oppung ta na jolo i, sada dope rohana. Marsiurupan do nasida, mar siadapari. Sude do salpu nang pe itikki i, dang adong ugasan na jago songon sinuaeng on.
Mangombak balik, mardege eme, marduda eme, marsillok, sude salpu do hatop, isiala rap mangulahon, satahi saoloan marsiadapari. Jala maol dope tarida, jala dang ha idaan dope hosom, teal, elak, dohot late i anggo uju i.
Je imasa nuaeng, sude do rade. Adong Jetor, Komben, Masin panggiling eme, dalan ni aek nungnga ipabagak, ale tong do sikkor.
 |
| Maradi satokkin tikki masa manillok i juma ni A. Pinondang Sitanggang, Kamis (1/12/2017). |
Dang adong be marsiurupan, marsiadapari, sude nga lonong. Sigajion nama luhut, ipe tong sipata maol dioran.
Hape nian, tung i ma tabona, molo marsiurupan, marsiadapari. Rap mamanganton gulamo na tinutung, dekke na ni arsik, pinatupa ni par hauma. Dia pe loppan dipatupa, soi nama tonggi na, ala rap mamangatton di hauma, songon si na uju i.
Songon i sada huta nuaeng i bona pasogit Samosir, nga tung massai maol dioran lao pasada tahi songon si na uju i, rap mangulahon, marsiadapari. Sude marsibuat-buat na nama. Ise nagogo botohan, suara, adong getep na, ima na monang.
 |
| Paimahon diparade sipanganon, marpoto jo satokkin, Kamis (1/12/2017) i huta pasir Lintong. |
Alai anggo akka dongan na pogos manang na susa, tung lalap do talu. Dang hinata, adong do dilehon pamaretta akka ugasan ibagasan sada punguan. Alai, holan uluan do nampunasa, ala un gogo soarana, jala balga botohan na, huhut adong getep na.
Molo pinukka parsoalan taringot i, sude panombosan na. Sahat ma hu paradaton, par haha maranggion. Molo sai dijugul hon, pittor haruar ma hata, pabilak-bilak kon, pajago-jago hon, pamalo-malo hon, dohot lan akka na asing dope.
Imasa nuaeng on, nungnga hurang be holong i. Nga mago be poda ni akka na parjolo i, na mandok, rap ma hamu sauduran, hu dolok nang hu toruan, asa sada songon dai ni aek, unang mardua songon dai ni tuak.
Laos tarida do nuang on, naung gok manisia i si laosi poda. Didok na parjolo i, unang sumolsol i pudi, dada sipasingot na so ada.
 |
| Mangalap gogo satokkin, manginum aek Sitio-tio, paulak hosa loja, itikki marsuan eme, Kamis (1/12/2017). |
Ida ma, dang alang marsialangan be i anggo nuaeng on. Songon nidok ni ende i, marsidugusan dugul-dugul na, hu dugul-dugul ni bao na. Hape na jolo, pattang ni napattang do dipakhulingi bao na. Alai anggo tikki on, nga margaiti be dohot bao na.
Dang holan i, alani parbalohan, parbagianan tinading ni na tua-tua ima songon tano manang hauma, dang alang be marsitoparan, marpakkaro, jala nungnga adong sahat marsimuan na marhaha maranggi alani hinorus ni hodok ni na tua-tua.
Ido asa apala nuaeng on, gok na mandok, molo mulak pangaratto, dang be parbue ni tangan diboan mulak tu huta, alai meter nama.
Hape na jolo, tung i ma rikkot ni akka na tading di huta laho manomu jala pasangap hon diakka tondong pangaratto. Polado ikkon i loppahon sada na marhabong, dipatupa laho parmanganan ni na ro sian tano pangarerahan mandulo na tading i bona pasogit.
Torop anak dohot boru, dang laho dais mamanganton i, i anggo dang parjolo akka pangaratto ma manganton pinatupa ni na di huta. Olo do nanggo apala hua nai, dang dais hu ianakkon dohot boru, asa sonang rohani pangaratto naung ro mandulo tano hatubuan.
 |
| Rap marsipanganon di hauma itikki masa sillokon i huta Pardugul Buhit, Kamis (1/12/2017). |
Dang hinata nian, itikki i, na di huta pe, arga do di bahen akka na mulak sian tano parserahan. Pittor di boan do silua ni tangan na tarsongon roti, dodol, akka sipanganon naso adong dope tikki i luluan manang tuhoron i huta.
Molo naeng borhat ma muse hu tano parserahan, tor di tadingkon do silua na hu na tinopot di huta, dilehon parsidemban dohot parsijajan ni akka i anakkon dohot boru.
Alai anggo hu sonari on, nga tung massai maol luluan i anggo na songoni. Haru di huta nungnga marsibahen-bahen na.
Sude i, ala ditikki on, di jolma nuaeng on, ngga marurat be hosom, teal, elak, dohot late i. Ido asa adong habegean nuaeng hata, sonang marnida na susa, jala susa marnida halak sonang.
Nuaeng di huta, mulak hu na marsuan eme, marsibahen lomo na nama ala adong ni hepeng. Pola do ikkon daotonan eme molo nungnga boltok, unang dipagut apporik. Alana, dang sauduran be marsillok.
Hape, molo ni etong-etong do gogo na mangula i, manuhor pupuk, mambayar Jetor, upa ni pangula diakka na manggaji, sewa ni komben, sude ma tahe, dang be suang sian gogo ni na ta ula sian hauma i. Holan asa adong nama tahan bok. Ala idok, molo nga adong ni ida marisi eme i goni i, ngga bosur siubeon.
 |
| Oppung rido Br Sinurat, mangarorot pahompu na, asa unang lola marsipanganon, Kamis (1/12/2017). |
Toho do nian, dang mabiar be male. Anggo si doiton nama naso ada, nga boi idoit pakke sira i. Bosur papangan, marisi nang siubeon.
"Ta padao be ma sian rohatta, hosom, teal, elak, dohot late i. Asa rap sonang hita, sonang so haribo-ribo an. Rap ma hita, satahi sa oloan, hudolok hu taruan, marsitungkol-tungkolan, asa dapot akka ni luluan ta be, jala jumpang na jinalahan. Asa gebe ma ni ula ni tangan, jala sinur nang pinahanan."
Songoni majo saotik songon sarita sian tano hatubuan Samosir. Molo tung pe marambalangan, alai anggiat ma boi gabe songon gombaran di hita saluhut, taringot na masa tu nuaeng on.
Molo adong di akka na hurang lobi na hupandohi manang hu guretton i, mar panganju hamu luhut.
Songon panutup, dohonon ku ma, ramba naposo na so tubuan lata dope, au naposo na hurang mangantusi hata dope.
Sahat-sahat ni solu, sae sahat ma hu bortean. Sahat ma hita leleng mangolu, sai sahat ma hu panggabean, sahat ma nang hu parhorasan.
Eme ni si tamba tua ma inna, parlinggoman ni si borok, amatta Debata ma do na martua, sude ma hita ton-tong di parorot. Horas...Horas...Horas. (Hrey. S)
Narkoba Dan Obat-obat Terlarang Adalah Racun Mematikan.
Mari Bersama Selamatkan Generasi Bangsa Ini Dari Bahaya Narkoba Dan Obat-obat Terlarang Lainnya.
